幸福的‧2個家

自我懂事以來，我已經明白到親情係一件多麼可貴既事。與家人和睦相處時，我會容易、簡單地感到快樂。

離開了香港好一陣子，總會覺得欠缺了很多東西，但眾多事件當中欠缺最多的莫過於親情了。我時時都會向老公提及到我相當掛念我的家人，有時候講起都會無端端的落下淚來。有時候，老公會笑我，笑我是個長大不的小孩子！有時候，他懶得理我，哈哈！沒法子啦，我太愛我的家吧！「一家人」能成為「一家人」真是一件很奇妙之事！我家只屬一個小家庭，只有爸爸、媽媽、哥哥和我，所以我對他們每一個也算不錯。對嘛？爸爸媽媽。

由嫁給我老公開始，我既人生便多了老爺、奶奶以及2位家姐，1位哥哥了！從來沒想過要於這新的家要扮演什麼角色，只是想要對老公好，也要對他的家人好！坦白講老公以前跟家人並不多聯絡，直到我既出現，直到我時常在他身旁唯唯諾諾，他已經改變了很多了。

早於一星期前，我的老爺進了醫院，我倆在外地不能出手相助，只有擔憂，唯一可以做的就是在遠遠的地方為他祈禱。我知老公是擔心阿爸既，不過，男人好多事都會放係心唔會講出口，所以我做了一個「八婆」既角色，每一天和他家人保持緊密既聯繫，這亦是我首次和老公家人有如此緊密既聯絡呢？我不知道這樣做會否打擾他人，但... 至少做好自已本份。

我要感謝2個家，因為你們都賜給我一個溫馨呢！

老公放心吧，萬大事都有我作你既後盾，一日有我既存在你都不會孤單，也不會寂寞~ 祝我倆會互相扶持到老。

Movie Night

今晚係Confederation Park有室外小電影睇，食飽飽後便出發。本來係8點半放映，但因為天唔夠黑既關係，所以等到差不多9點才放映。 

由Chevron呈獻既"How to train your Dargon!"

估唔到會有咁多人一齊睇，不過可惜，個Screen唔夠光，以及晚上天氣太凍喇，所以我睇到中場便走了。現場可見... 好多人都好醒咁帶定「被」來觀賞的。

覓食~

August 24, 2010

今朝早早就收到Starbucks寄來既免費咖啡Coupon，真高興。

另外，我倆今晚出外撐枱腳，本來想食哩間意粉屋，但估唔到佢日日都咁鬼多人排隊，所以我地放棄了，最終都係食返越南河！

沿路上一間蔬果店既蕃茄，真係相當大，差點就大過老公隻手！

每次去到哩間店，我都一定會食哩碗酸辣湯河，但每況愈下，我承諾下次再去哩間店食野的話我會轉轉口味！

Homemade Cake

August 23, 2010

今早起床時見到報章報導香港康泰旅遊團被劫持，一時間整個溫哥華華人電台都廣播這事，估不到至到晚上既報導竟然轉來做成多人死亡，心情突然變得重了！旅行本來係件開開心心既事，點解會變得如此傷心？邊看著報導，邊憤怒，邊含著淚... 這種感覺多痛苦，但相比受害者家人我呢D痛又算係咩呢？願主帶領亡者走到你跟前去。亦因為世事無常，請大家珍惜眼前人+及時行樂！

另外，今日阿愛教我整了這個茶葉味雪芳蛋糕，感覺係重溫緊當年學整蛋糕的課堂呢！

我想食的‧都食到了

August 22, 2010

現為舊曆七月，所以我地今日去咗拜阿麻阿爺，今日天色相當要好，一入到佛寺就見到好靚既蓮花。

蓮花雖然開始凋謝，但還是依然美麗。

蓮花雖小，但原來佢既葉係咁大咁圓既！

哩D唔知會唔會係我地食既蓮子呢？

除咗拜阿麻阿爺既一刻我停下來誠心祈禱外，別的時間都是在欣賞佛寺內的景色。

離開寺院後，我地去到Richmond既Kingspark食午餐，嘩~ 我終於食到我想食既野，以及飲咗一杯好耐無飲過既... 「好好好立克，好好營養高」。

PNE Playland‧100th Anniversary Parade

August 20, 2010

估唔到係溫哥華會遇到咁多節日！

適逢溫哥華既PNE今年係100歲生日，所以今日係English Bay舉行咗一埸大型既花車巡遊，好榮幸我可以欣賞到。今次巡遊大約出動咗2,000位表演者，以及12個巨型既吹氣公仔。

我未曾參與過任何花車巡遊節目，今次係第一次，比我相像中差少少，差D咩我又講唔出！不過現場既氣氛相當好，總叫無白睇啦！

哩隻係PNE既主題公仔~

表演當中我最愛睇小朋友「扮」野造型，好可愛。同時我都相當敬佩佢地，因為D音樂聲好細，我估佢地都唔係聽到好多，但佢地都好專業跳得如此整齊！

BBQ Day

August 18, 2010

今年一定係我有生之年BBQ得最多既一年了~

BBQ我既至愛係必定係，雞翼 + 腸仔 + 魚蛋 + 墨魚丸，百「食」不厭！

Starbucks‧同樂日

August 17, 2010

老公閒時日日都會去下M記品嚐Coffee & Muffin，不過今日決定「升呢」去飲吓Starbucks Coffee！兼且我地2個搞咗個Starbucks同樂日，活動包括Sudoku大賽 + 睇書，如此細少既一樁事於我眼中經已是一樁大事了，足已叫我滿足滿足！

不過...又係咖啡因既關係，搞到我心跳加速，整個人都處於興奮狀態！

Starbucks Coffee, Relax Day

另外，因為長時間處於無事幹既情況，所以我經常係圖書館借書睇，呢堆書係我今日借既傑作！

係香港好多時我都只係會睇某幾位作家既書，但係哩到，我嘗試睇多D唔同作家寫既書，果然係有唔同既感覺！

Grouse Mountain‧行山日

上星期既行山活動取消咗皆因溫哥華終於落出雨來。落咗幾日雨今個星期相當天，撞正Jimmy放假，終於可以行行講咗好耐既Grouse Mountain了！

坐開篷車，吹到我變成個傻人咁既樣！

呢個就係Grouse Mountain Trail既入口，4個人浩浩蕩蕩咁係哩到出發！

哩條Trail相當多人行，萬一有咩意外一定有人幫你打911，哈哈！由起步開始，沿路都係上山，真係行到我索晒氣！好彩，路上都有好多樹蔭位可以休息休息。

經過一番搏鬥後，我總共用咗個半鐘完成今次既行程。我估... Jimmy同老公應該係目的地等咗我地2位女士大約半個鐘，真係辛苦你地喇 (因為山頂有好多蚊呀，蒼蠅呀)！

行完山真係熱到跳舞，見到有D咁捧既免費消暑器，我又點會放過佢呢！

係Grouse Mountain上面有好多哩D雕像，當中見得最多就係「黑熊」喇，因為Grouse Mountain冬天成日都會有「熊之出沒」！

Grouse Mountain上夏天既景色~ 諗諗吓... 呢個Mountain有D似香港山頂，因為佢又有餐廳，又有商店，又有畫廊，仲有戲院等等...

眼前所見到既就係冬天既滑雪場，真係諗唔到夏天會變成咁既樣！

本來打算行完上山會挑戰跑返落山，因為搭纜車落山實在太貴喇，要成CAD$10一個人，但老公太啺我喇，怕我頂唔住叫我跟Jimmy & Oi搭車落山，而佢... 佢就一個人跑落山。

雖然搭纜車落山咁貴，但都有相當多人搭。我地等車等咗差不多15-20分鐘，搭纜車大約用咗2分鐘多少少，跟住行返去車攞水飲，再返回Trail入口處等老公，都未等夠5分鐘佢就出現咗係大家眼前，嘩，佢真係好快呀！佢唔比CAD$10搭纜車真係明智既決擇！

流星‧雨

近期唔知星球搞咩大戰，繼上個星期係加拿大上空可能見到北極光(Northern Nights)後，一連兩晚又可以清楚睇到英仙座流星雨 (Perseids Meteor Shower)！

8月11日晚一行6人一齊上咗Burnaby Mountain欣賞哩種年年都有既天文現象，雖然係話年年都有，但係係香港既時候，我從不會有咁既閒情去欣賞哩D天文現象！大約晚上10時許到達目的地，估唔到抬頭望上天有如此多如此光既星。大約等了20分鐘，我感覺到自己睇到一粒滑得相當快既星，我不敢肯定自己是否已經看到「流星」，但過了幾分鐘，有一粒既大又光既「流星」在上空飛過，今次真的可以肯定了，因為這顆星我們一行6人都見到嘛！大約11點左右我地離開喇... 估不到我地會選擇最多流星滑翔的一刻離去！雖然係可惜，但已經覺得幸運及滿足了。今晚我既幸運指數係4粒。

~借用一張由某人於Abottsford影到既相片~

8月12日晚再一次一行6人去觀賞「流星雨」，根據網上資料顯示，今晚會係「流星雨」玩樂既高峰期，係最高峰既時候每小時會見到100粒「流星」出現！懷著相當興奮既心情再次去到Burnaby Mountain，誰知... 今晚睇「流星雨」既人多不勝數，不但整個停車場「滿座」，就連沿路上山既兩旁也擠滿了車！姑姐呀、阿嬸呀都話從未見過Burnaby Mountain會有咁多人出現！兜了一個圈，無位... 我地只好轉移陣地去到Capitol Hill附近既一個公園仔，估不到，Set好晒位之後抬頭一望已經見到一顆很大既，今晚比昨晚幸運得多，因為一小時內睇了大約8至9粒大大小小既「流星」！清楚看到滑下來的「流星」係『金色』！見到大粒大粒滑下來既「流星」已經萬分興奮，但最興奮、最特別都莫過於睇到「孖流星」既出現！一小時內見到如此多既滿星飛舞，真教我滿足~ 滿足~

~再一次借用某人所拍得的照片~

即使帶了相機準備影流星也沒用，因為當見到流星既一刻才按鍵的確慢了，更何況見到流星出現實在有太多太多事要做了，又怎會想到只管拍照呢！睇到流星另外最好要做既事應該會係許願，但... 流星真的走得太快了，每每見到它的時候只會忍不住大叫一聲「嘩」，然後便忘記要許願這件事！加上流星飛逝，既要確定自己是否看錯，又要嘩然，根本來不及許願！不過，當我見到唯一一顆較長較慢既流星時，我忍著嘩聲，許了一個願，「願我所認識的人身體健康」！所以呢向流星許願其實係一件太遙遠既事啊！

Picnic‧日

星期日跟姑姐一家到Burnaby Mountain Picnic，嘩，清高氣爽既天氣真係叫人心情靚靚~

見到好多蜜蜂非常勤力咁採花蜜... 小蜜蜂，翁翁翁，飛到花叢中~~

今年煙花特別‧多

July 31, 2010 (Saturday)

今朝7點半就起咗身，因為今早約了八叔送我去睇牙！事緣有一日覺得右邊隻大牙唔係咁對勁，於是叫老公幫我睇睇，一睇佢話我好似蛀咗隻牙，心諗唔係咁唔好彩又要睇醫生嘛？經過幾番掙扎(掙扎都係得一個答案，就係唔想花錢！)，都係去睇睇安全點，皆因唔想連累周邊既牙都有事嘛，就係咁... 花咗CAD$62去買個安心 (包括照4張X-Ray + 影牙齒既相 + 醫生診斷費)！

醫生睇完話... 其實果隻牙可能係我好耐之前補過，只不過依家冇咗D粉係面，所以會見返個「Hole」係隻牙上面！佢話我D牙齒都叫健康，可以返香港先搞都不成問題，但係醫生就好好心咁提我... 若果可以的話就儘快除掉智慧齒，因為我既智慧齒係橫放怕日子久了會對其他牙齒有影響！聽完我只係「哦！」了一句，無他既... 一切既事都等返到香港才算吧！

另外係Vancouver呢個地方每年都會有煙花比賽，今年有幸可以親自欣賞，實是一件樂事。不過始終都係香港果D... 好睇D、壯觀D、同埋煙花圖案變化大D！

今年參賽既有German (21/7) > Spain (24/7)  > Mexico (28/7) > China (31/7)，有幸今年一次過睇咗2次煙花，一係西班牙，另外係中國。所以係我心目中「今年煙花特別多！」

西班牙煙花滙演 (24 July) - 因為睇西班牙真係係岸邊欣賞，所以場面較為震撼，視覺也較為清晰！

中國煙火滙演 (31 July) - 放煙花前先放返首「國歌」，嘩，真係精神為之一陣！今次遠離岸邊無咁震撼，但我還是如此興奮！

太陽伯伯‧回家去 (日落篇)

July 29, 2010 (Thursday)

放長假期間，除咗係澳洲有好好整過早餐外，其餘既日子一係瞓得晏無食早餐，一係太懶無整野食，一係食隻蕉，一係食Cereal，一係食麵包！今早唔知咩事突然起身整咗2個Burger做早餐，嘩！好好食，真係好好食！「牛肉扒 + 蕃茄 + 芝士」，真係Perfect Match!! 塊扒D汁不停咁流出來，真係好味到呢...

而今晚食過晚飯後，我同老公一齊去睇日落。睇住太陽伯伯落山，太陽伯伯緩緩西沉，藍天晚霞，雲海斜照，變化萬千，慢慢地太陽伯伯便躲到山後。這個自然景色跟日出一樣，真的叫人百看不厭，令人陶醉，但頓時又少不免帶有一種淡淡哀愁。或許我再一次感受到時間永不會停留，而它只會悄悄地從你身邊流走，雖然是悄悄地走，但卻走得很快、很快！