Our Life in AUS‧澳洲之旅

二零零九年九月十七日 (四)
(HKG > SYD)

早一段日子忙著執屋、搬屋，全因為了離開香港的一個序... 我倆辭了自己原有的一份職業，為的是實現大家的夢想，又或者是實踐大家結婚前的一個承諾呢！家人們，什至很多朋友都對我倆離開香港出走遠行表現出不同的反應，但無論如何我倆都決定出外走一趟！多謝家人及朋友送上的無限祝福以及晚餐呢！

今天哥哥嚷著要到機場，老是說要品嚐Hungry Jack，但最終佢都冇食！我估... 其實佢並不是想食Hungry Jack，而是他太捨不得我吧！Anyway, Terence,多謝你最後趕緊送我倆一程！

二零零九年九月十八日 (五)
(SYD > Batemens Bay)

搭了成晚機，但今次竟意外地我沒有瞓足全程，或者是機上太多小朋友，又或者太多人行來行去吧！我身邊果位「小朋友」就更加瞓得少，因為佢話有好多新電影，所以佢要爭取時間！最終佢都睇唔晒d戲！佢話佢有努力嘗試瞓，但當佢一入睡時竟有位大嬸認錯人摸了他的臉，即時搞到佢瞓唔返了！真慘！！

用了差不多2個鐘才能出到境！感覺好似返咗大陸more than外國地方！之後立即趕往M2000取車，誰知... Book咗既車會無貨...只好用店員建議的另一部私家車啦！「頂！」點知Check單時先發現佢地都係收緊Online price，龍生即刻問佢呢部唔係平D咩，佢先減返比你，諗諗下佢地同奸商冇咩分別！

食過早餐，龍生即刻馬不停蹄地趕路，原路見到太多太多「超美」的自然實境，例如到達Royal National Park，個天同海既顏色係一樣地藍，又見到人玩Sky Dive，第一眼見到時仲以為係有隻大鷹係個天到飛過，睇真d先知係自己對眼唔好！見到d人係個天到係咁飛感覺真係好自由。由Sydney到Batemans Bay差不多走了280Km，終於見到一間YHA，真係不得了！要立即Book返間Private Room梳洗梳洗~~不過瞓一晚Cabin要成A$65真的貴死人，為的是要一個屬於私人的洗手間。由於係貴野，我地用盡佢地既水洗埋衫，然後爭取時間瞓覺，因為明早要十點Check Out呢！

P.S. – 今天早餐食了個麥記，估都估唔到晚飯會食埋KFC…真係慘爆！

二零零九年九月十九日 (六)
 (Batemens Bay > Melbourne)

今早因為太懶了，鬧鐘响了都冇人願意起床，到起床時又得返好少時間，亦都因為有d衫未乾的原固，龍生又出絕招，今次佢出碼「叮」襪，點知... 失手，係冇錯... 佢失手，搞到大家都冇咗一對襪之餘仲要搞到人地個微波爐有陣"lor"味，令到成件事"lor"上加"lor"！！

Check Out後走到附近的海灘，對住個海品嚐了最美的早餐(香蕉+蘋果)後，又再一次趕路到Melbourne了。坦白說，是次澳洲之旅我們真的沒有好好計劃過自己的行程，只好見步行步呢！由Batemens Bay到Melbourne要行800公里路，而我地總共入咗3次油！(3次都唔係入滿既放心！)

之前聽哥哥及大家姐講過澳洲某一d時段駕車要特別留神，因為d袋鼠會唔知咩原因走出街向你部車個車頭燈衝過去！我2一路行一路好小心四周環境，誰知路上見到最多並不是袋鼠屍體，而是wombat + wild-birds呢！佢地死狀可怕！即使去到油站，有一位大貨車司機也不忙提醒我地！叫我即時諗起：「路上零意外，澳洲人人愛！」 哈哈 :) 由於今日一路趕路，入到Melbourne已經凌晨十二點了，我們只見到Hungry Jack，所以今晚就食佢，亦都因為太夜冇地方瞓，我地今晚選擇了88號Domain Road有錢人屋外停下車來，於車箱內度宿一宵，不禁說句Wonderful Night!!!

二零零九年九月二十日 (日)
(Melbourne)

一早起身去到附近既公園既廁所梳洗一下自己就開始今日既旅程，是日算係係街上行得最多的一天，於墨爾本市中心遊覽感受澳洲第二大城市的色彩！同時亦行了South Bank既Sunday Market，搭埋佢地既免費觀光Circle Tram，發現這裡散發一種濃厚的歐式風程，熱鬧的市中心亦有不少新舊建築Mix & Match呢！四周環境即使拍下來也未能真正感受到！所以只好努力地用心記於腦海。

由於今次之行是屬於save money trip，所以我地預計會「食得唔好，住得唔好！」但係係save money前，我地今晚去咗一間中國餐館食咗2個牛肉飯，成為A$22，即使係貴，但都算滿足一下！


今晚入住Back of Chapel，地方唔係唔好，只不過間Motel裡面環境唔太好，又要同其他人一齊share廁所，所以都唔太整潔！2晚要成A$110，真係好貴，(呢間已經叫最平了)！又有一個地方唔太明，點解d外國人用完既地方特別dirty!!~~

二零零九年九月二十一日 (一)
(Melbourne)

今日係最後一日係Melbourne，plan好咗去Queen Victoria Market，點知... 今日係星期一人地冇開！都係我唔好冇睇清楚人地開工時間，搞到Joe白走一趟！之後我地去咗Luna Park門口影相，又行吓海邊，又行埋Royal Botanic Gardens，又行埋Remembrance Garden，真係行得太多了。係d Garden到成日都會見到好多人係草地上瞓係到傾計，心中不其然又會諗... 點解d外國人咩都瞓一餐...?? 難道..."That just life??" 我同Joe都不甘視弱瞓埋一份！係Melbourne只是未坐Puffing Billy Railway，見到d人可以伸對腳出車外真係好想伸埋一份！但係一諗到費用太貴時，只好放棄以及...「忘記它...等於忘盡了一切」！

由於今晚係最後一晚住Back of Chapel，除咗要好好瞓返一覺外，仲要使出我地既本領，就係用盡佢地既水清理我地既衫！仲有用埋佢個廚房煮個「出前一丁」呢！

明天一早起程趕路到Great Ocean Road欣賞十二門徒石！

二零零九年九月二十二日 (二)
(Melbourne > Great Ocean Road)

今日一早就起身，因為要為迎接十二門徒石做好準備~ 準備d咩?? 就係準備 "GET CLOSE TO NATURE" 哈哈哈哈 :D

一路上經過好多地方，例如有Bell’s Beach – See the world renowned surf，不過睇浪既人多過玩浪既人呢！呢個地方可能好近海，所以係好鬼死凍!!! 等咗一陣都唔係見到好大浪，加上有少少雨，所以企咗一陣又繼續進發了。

下一站去到Lighthouse – Split Point Lighthouse，其實係澳洲都有唔少呢d Lighthouse，睇埋去冇咩特別，但係要上去呢個塔就多謝每位10蚊澳元，嘩... 真係比我都唔上去啦！一日做夠20個，佢一個月都賺好多喎！睇完呢個塔既外觀後...

我地去到Lorne，由於本書介紹Fish & Chips係呢到出名，所以去到Lorne當然要試下啦！點知2個傻鬼 一人叫咗一個！O My God，一份既Size根本可以比3個人食... 我地叫咗2個，真係食到想嘔呀！

跟住又繼續上路，一路上有好多彎，有d彎只可用「型」來表達，而一路上亦都有好多好靚好靚既風景，我有試過用相機拍下沿路的景色，但所有景拍下來跟本是2回事呢~~！到達了十二門徒石已經是日落時份，雖然是下著雨、超大風、很凍，但能夠見到十二門徒石咩都可以忘記！加上我已經有一顆好”HOT”既心，所以頂得住！12th Apostles – see the uniquely famous rock stacks! 之後再睇埋Lorch Arch Gorge，呢個峽灣，真係Amazing！ 小時候，見過有關十二門徒石的一些報導，已經覺得好神奇，覺得造物主一定要行一些神跡來告訴世人衪的確存在，又可算是大自然偉大的傑作，亦有報導講過呢幾舊石好快會消失，因為長時間受到海水及風既侵蝕呢！真係發夢都估唔到，十多年後的我能有幸親眼目到它們呢！當時帶著滿足、興奮及感恩的心，再一次用心感受我所看到的一切事物！再一次多謝主，你創造了這個多麼美好的世界；多謝老公長時間趕路為實現我地夢想！但美中不足的是... 若果爸媽及哥哥也在，整件事會變得更完美呢！

離開了十二門徒石，我地去到 Port Campbell，因為睇完所有石已經天黑了，今晚好凍又下雨，附近都冇咩地方食野，所以只好停下來食一個大Pizza，亦有試過 找Motel，但... 亦都因為唔想花太多錢，所以我地搵咗一個向海既靚位，再一次係車度宿一宵！今晚個公廁好乾淨，所以刷牙都刷得好開心...

明早會再一次Encore，去十二門徒石迎接日出 :)


二零零九年九月二十三日 (三)
(Great Ocean Road > Melbourne)

今日天未光，我倆又再一次享用公廁梳洗，為的是要目睹十二門徒石日出的一面，不過今日天氣真係好凍，仲落好大雨，根本沒辦法同十二門徒石影到一張好相，由於越來越大雨的關係，我倆只好放棄並回程，係回程既時候終於見到，終於第一次見到袋鼠係馬路上跑，不過呢隻袋鼠都好聰明一見到早走過佢自己都不停走迫開車輛。不過行到中途又見到一隻黑兔走過，真係好危險！

早餐係Foodworks買咗麵包加咸牛肉，去到Dangerous Port邊欣賞海境，邊品嘗唔係太好味的早餐，之後出發到Geelong，但去Geelong時沿途經過Lorne Beach見到好多一層一層既石，巴不得停下來好好享受一天呢！

停留了約二十分鐘，又再一之趕路到Geelong了，入到Geelong除了見到平價水果店外，仲見到沿路有好多私家車都掛上了Geelong Cat的一支旗，心諗Geelong市民真係咁愛自己既地方?? 係未有答案之下我地去到Geelong Waterfront見到104個Wooden Sculptures令到我萬分興奮，用咗差不多2個鐘行完整個海岸，鬼知2個「窮鬼」行完之後會將餘下的麵包加咸牛肉當成今天的午餐呢？

因為明天要到第一個WWOOF Farm開工，所以最後都係返咗Melbourne搵YHA瞓覺好同埋梳洗一下大家，搵到YHA後去咗Coles買公仔麵返YHA煮呢！

**原來Geelong Cat係一對足球隊，今個星期六就會係Geelong大戰Melbourne，Melbourne果隊係叫St. Kilda，呢個應該會係二個地方既人心目中的「大事件」呢！