Our Life in AUS‧澳洲體驗之旅 - 2nd to 4th Farm

二零零九年十月八日至十月十六日(2nd Farm - Smara Spring in Bungendore)

Day 1 – 十月八日

今日我地要由Melbourne去到Canberra所以一大清早我地就起生，今日再一次辛苦龍生了，因為佢要由六點開始揸車，足足揸十二個鐘先可以去到第二個Farm到，途中我地經過Healesville，哩個地方係今年2月時受到山林大火洗禮，但我眼前所見到的風光根本無辦法令我相信哩件事！另外，途中我地仲經過Snowy Mountain，果到好靚，因為成個山都鋪滿了雪，想不到係澳洲會見到哩一幕！

沿路落山，見得最多係一隻二隻既袋鼠屍體，即使叫龍生緊張起來。大約下午六點幾終於去到第二個Host到，佢地叫Pthalo & Phil，之前佢地已經叫我地唔好太遲去到佢地屋企因為佢地六點幾要食飯，點知去到佢地都食緊喇，講講吓先知原來佢地係趕住出街，所以食完晒野得返我、Joe以及佢地隻狗Blossom 係間屋到！外國人，真係外國人，我地只不過係見咗一個鐘左右，佢地就留低我地係屋企，係香港一定唔會有哩件事發生！

就係佢地出去既時候，我地去咗享受沖涼，因為佢個廁所不但有好好既熱水供應，仲有佢個廁所係有Heater ga，實在太好了不用再捱凍了。沖完涼我地就準備瞓了，因為今早實在太早起身了。

Day 2 – 十月九日

之前揀去哩個Farm既主要原因係想去Florida花卉節，今日有幸放工可以去行吓，仲要係由Host – Pthalo送我地去。真係爽！今次哩個Farm除咗我地兩個之外仲有一位韓國人。佢好搞笑ga…佢仲話阿Joe好似一個韓國明星呢！

Day 3 – 十月十日

哩個Farm同之前果個好唔同，因為哩到主要係要幫佢打理屋企既後花園，真係好大！日日都有唔同既野要做。

今日放工我地一人三行一齊去咗屋企後面既後山，我地見到好多，好多大大細細既袋鼠，仲見到2隻箭豬啊！

Day 4 – 十月十一日

由於星期日係Day Off，所以我地今日又再一次三人行去玩喇！我地今日去咗好好地方，當然全部都係免費啦！我地去咗The National Museum of Australia、Australian War Memorial、Canberra Deep Space Communication Complex、Old + New Parliament House & Old Bus Depot Sunday Market，全部都各有特色，但我個人最喜愛Australian War Memorial，因為佢有好多故事都係以Art來表達，每一幕都好真實，佢仲展現咗澳洲戰爭及和平時期既歷史。但最悶係Parliament House，佢係一個大過香港好多倍既立法會，去到真係無咩好睇，但係又有好多旅行團到此一遊！

Day 5 – 十月十二日

今日已經係哩到做咗五日野喇，但係五日都係係到除草，除到手都痛埋！今日同Pthalo傾開計，佢話哩到十二月太熱，若果要開工佢地會由早上四點幾開始，目的係要避開太陽伯伯，嘩...我即時話四點幾...我有時都未瞓呢！哈哈...

Day 6 – 十月十三日

放工諗唔到去邊，所以出咗去市中心行，我地去到Woodworks全部都係木製品，好靚，但好貴，有一張書枱賣成A$10,000，嘩！我問阿Joe佢地係唔係講緊港幣呀？不過佢地每個設計師既製成品真係好靚！

Day 7 – 十月十四日

放工去咗附近睇風車，哩d風車係政府擁有，但由於佢擺放既位置係私人地方，所以政府要交租比呢個地主，聽聞一個哩d風車年租一萬澳元，我地望上哩個山頭都應該有六七十把，嘩！咩都唔駛做一年有四五百萬港幣收入，估唔到一塊爛地，都搵到咁多錢。

我地揸車去到果個地方，但由於果到係一個私人地方跟本唔可以入去，所以我地就停低，點知唔夠五分鐘，有個好冇禮貌既女人走埋黎問我地，你地知唔知哩到係私人地方，你地係唔係都鍾意人地去你屋企門口睇哩d風車呀…beeleebala…唔停咁係咁講…真係吹漲！

今日我揸棍波車由街口送阿Joe返去個Farm到，時速50km per hour，哈哈，唔再係30喇... Yeah



Day 8 – 十月十五日

今日係最後一日係到做野喇，係哩到好開心，因為日日都食好野，日日都有好多事分享，日日都有電影睇，今日我地仲去咗每星期一次既酒會tim，真係Happy Happy！

上一次提到我地好似升咗Level，因為識咗個法官同物理治療師，今次都唔野少，因為女主人係一個Art好勁既強人，成間屋到佈滿佢既作品，另外佢既爸爸係NASA(美國太空總處)到打工，而男主人係一位Editor，真係又見識多咗了。

十月十六日 – (Bungendore to Mildura)

今朝一早就離開咗個Farm，目的係要去Mungo National Park，果到幾萬年前係一個湖，乾確後變成依家呢個咁靚既沙丘，澳洲人稱呢到為Great of China。由於唔可以一日去到目的地，所以全日都只係趕路，今晚我地打算瞓車，生活真係艱難，一離開個Farm就要瞓車喇！

*今日用咗A$0.99，買咗一枝750g既花生醬，真係抵到爆！

十月十七日 – (Mungo National Park)

天都未光，我地就去咗附近既公廁梳洗，之後向Mungo National Park進發，沿途景色真係把我嚇怕，因為真係好靚！...... 龍生第一次揸入哩d爛石路段，仲要行二百幾公里，我地就「櫈」到「Nut」肺，架車就「櫈」到「Nut」轆，幾驚佢頂唔順。皆因入哩d路個個都用四驅車。

Mungo National Park大約五萬年前係一個湖，直至到1981年被人發現，而哩到亦都叫”Walls of China”，我地揸車入由起點開始觀光哩個National Park，起初並不覺得有何特別，但再向入行，發現一個好大沙丘，真係以為自己發緊夢！因為真係好大自然，好靚，紅紅的白白的沙！

係哩個National Park，我地見到好多駝鳥，仲見到一條介乎蜥蝪同四腳蛇之間既四腳爬爬，佢真係好樣衰，龍生就覺得佢地似一條屎多D！

當自己係外國的時候就會諗... 外國人真好剩係遊自己國家都可以遊幾年，但係香港就太細小了... 不過當自己諗起香港既美食時，我又會好掛住香港啊！

十月十八日 – (Broken Hill)

第一日去到Broken Hill，我地就去咗Library，哩到d人個個都好古怪，d人個樣好惡，阿Joe話佢覺得佢地似西部牛仔look，所以會粗豪d。去到Information Center問路以及去咗YHA訂房。

放低行理，我地去咗礦石山(Miners Memorial)，上面有一張好大既櫈，我地2個不停咁係上面影相，玩哩張櫈都應該玩咗十分鐘，之後周圍行下，就趕去市外睇Sculpture。

有件好古怪既事，當我地去到既時候先知原來係要鎖匙入閘，而旁邊有個牌寫道，如要鎖匙請返回市內Information Center索取，咁我地又返轉頭，去到問果到d職員，佢地話要收A$10，仲要收A$20 Deposit，咁因為想睇唯有俾啦，點知入到去唔係淨係得一隻閘，而係有兩至三隻閘，要落車開，又要落車關，上上落落好鬼麻煩。最好笑既係上到先發現，有一條唔駛俾錢，又唔駛開關閘既路，分別只係行遠少少... 頂... 其實上山只有幾個Sculptures，但係只得一個最出名，佢係果個成市既標誌，我地上到去等日落，目的係等一個shot！而且哩到係有時差，所以我地真係等到”Shot”咗，哈哈！為咗充實d過我地係山上影咗好多唔同post既相！就當係自娛！唔知Broken Hill係唔係就等於斷背山呢！

十月十九日 – (Broken Hill > 向東岸走)

Broken Hill開車向東岸行駛途中，除咗明白到點解哩個地方叫Red Centre之外，仲見到好多死袋鼠，有乾咗既，有新鮮既，其中一隻死狀恐怖，佢肚破腸流，而四周有數隻烏鴉不停地開餐，最不好受係因為袋鼠死得太近喇，所以會傳入陣陣死屍味！除此之外，我地今日仲遇上幾個小型龍捲風，遠遠已經見到沙塵捲上天空，其中一個剛巧給我們遇上，當我地架車駛過時大家都感受到架車”Dee Dee震”，以及一陣大風聲，真係心都寒埋！仲有呀...我地今日係路上面見到羚羊做愛呀...佢地真係唔怕羞ga喎！

由於天氣太熱，又曬，搞到我地2個變咗黑人，但我係黑左邊，龍生係黑右邊，只怪我係乘客，佢係司機啊！不過不幸既事件又再次發生，上次我地去Bali曬太陽時，唔小心瞓着咗，結果係肚皮上留下5隻手指印，今次就因為我地著咗短袖衫唔記得將佢變成背心，一曬之下...大家既手臂又有2節色了！

今日龍生應該揸車揸到傻咗，可以用十萬九千里長征黎形容，因為佢朝早十點開始揸，揸到凌晨兩點幾！真係辛苦佢喇！由於我怕佢會悶，所以我都由三點幾開始開演唱會直至佢停下來。唱到喉都痛埋！係夜晚趕路時見到有隻袋鼠過馬路，幾驚會撞到佢，真係驚心動魄！

本身我地唔諗住要揸咁耐車，但由於我地今日只係食咗幾塊麵包，夜晚太肚餓了，又可能因為我地去到果d地方都唔係大城市，為咗搵間24小時既麥當當，我地一共揸咗...1030公里去Tamworth，真係搞錯！不過哩餐遲來既晚餐，真係好好食。麥當當萬歲！

十月二十日 (Armidale)

由於琴晚又係瞓車既關係，我地今早六點幾就起咗身了，第一站我地又去咗麥當當Check Email，點知check吓哩樣玩吓果樣搞到成九點先走！之後我地向Armidale YHA出發，然後去咗Coles入貨，今日我地見到一隻即食貴價意粉3蚊減至1蚊包，我地極瘋狂咁入咗10包！正，但係我地返到去YHA諗諗都覺得唔係幾夠！(2個都傻ga)

今日無特別去D咩地方，只係留係YHA休息，明天我地會向第三個Farm出發！

二零零九年十月二十一日至十月二十二日(3rd Farm – B & B in Mt Cotton, Redland Bay near Gold Coast)

 Day 1 – 十月二十一日

今日大約九點半離開Armidale YHA向第三個Farm出發。

今次出發比之前既心情更加興奮，一來係因為我地可以試吓住Caravan，二來哩個係Bed & Breakfast Guesthouse，做既野同之前果d應該會好唔同，相信會比之前2個輕鬆點！

大約用咗7個鐘，終於去到Mt Cotton，一到步大家先同Manager Julie打個招呼，然後氣都未回順，Julie就唔斷氣咁介紹我地住既Caravan+工作！不過，當佢一介紹我地住既地方時，我個心情出現十級大地震... 無睇錯係十級大地震！首先我地主既地方係要同2隻馬做鄰居，一打開門，我就聞到好大陣馬屎味！

入到去，見到張床係由2張瞓到你腰都痛埋既海棉做成！當佢介紹個洗手盤點用時，我再震... 因為佢d水係要用個10L水筒裝住，你要用既時候要自己Bump，但係個洗手盤係佈滿蟻，你要用就自己諗吓辦法….嗶！見到都真係心寒。

最大問題及最驚訝係駕車無廁所，如果要去廁所就要離開駕車，點知一見到，我已經即刻想走了！因為個廁所係用個露營帳篷做成，你要去廁所就要拉開拉鍊，然後，個廁所要自已倒屎倒尿+Bump水沖廁，如果要去「大」睇黎都幾麻煩！諗住已經震完，點知原來沖涼係要係Julie間房沖，仲要平日唔可以夜過9點，朝早起身又唔可以沖，依家先知原來係Farm到住Caravan未必係一件好事。哩d咁震撼既場面，已經令到我聽唔到我地工作範圍係要做d咩。

佢講完晒野，我地就要返返去Caravan從長計議，一來要睇吓繼唔續繼續留係到，二來係再check吓駕Caravan，三來諗吓今晚點瞓好。經驗查之下，原來哩個地方係無得開窗... 唔係應該係話係可以開，只不過佢果d防蚊網全都爛晒，如果你唔怕都一樣可以照開既！另外，哩到既車門係關不上，環視四周一陣，我地只係見到個衣架可以做門鎖，唯有用個衣架頂住先啦！真係頂、頂、頂！

我諗住係我一個人捱唔住啦，原來老公既心情同我一樣，只不過佢無講出口！(其實佢有潔癖)佢最睇唔過眼係，點解個主人唔俾d錢出黎搞返好哩個比人住既地方！佢同我既諗法都係一樣，如果今晚試瞓一晚無問題，我地就會係到瞓多一兩晚，如果頂唔住，就明天做完野走！因為我地今晚食咗佢一餐，點都應該幫人做返d野先走既！亦都因為咁今晚大家都好勞力係到搵 YHA！

*P.S.-各方好友，其實我地都有苦況，我地都有付出，亦有代價啊！

Day 2 – 十月二十二日

今日一早就起咗身喇，因為我成晚都處於失眠狀態，成晚都不停聽到d馬「各各」聲，又聞住佢地d味，真係好難瞓得到！我估哩個會係幾好既原因叫我地離開！而我今日都幫襯過自助廁所，感覺真係唔係太好受！老公仲大件事，因為佢一早起身無得洗頭... 最後我地用咗自己既飲用水黎洗頭及刷牙！

一離開住既地方，感覺重見天日，我地一早見到袋鼠仔+餵馬食早餐，搞吓哩樣搞吓果樣就到咗七點四十五分又係時候開工了。

一早去到Guesthouse就學整早餐俾個客食，今日學到整外國式炒蛋、Beacon、Mushroom及芝士蕃茄。等個客食完早餐我地2個先開始食... 食完洗埋晒d碗之後我地開始學執房，由於Manager唔知我地既去向，所以佢都好有心機教我地！雖然哩間B&B係2006-2008都攞過獎，但係原來佢所謂既執房+清潔都係麻麻。好快完成清潔工作，之後我地去咗做勞力工作，因為我地要係感覺三十幾度既情況下鋪路，真係又熱又辛苦，去到十點幾十一點先take一個break，就係每人一杯凍水，但係老公就慘d因為Manager諗住做好心係杯水到加冰比佢，但係加完之後老公發現隻杯有粒黑色野，搞到佢都唔敢再飲下去。

大約十二點半，我地即刻收工，即刻入返自己個地方到收拾所有行裝，待所有野安放於車後，老公走咗去做衰人，佢同Manager講我地要走喇，因為我地頂唔住個住宿，佢話Manager好好無做任何留難既事，反而仲講咗句Thank You呢！

走咗之後，成個人都舒服晒，我地向住Gold Coast方向進發！仲成咗餐最豪既麥當當慶祝！今晚亦都會係Gold Coast附近既YHA住一晚，明天再計劃怎樣做。

**P.S.係B&B到有一隻狗，但狗狗個樣好似好攰及好污穢，再細望下才發現原來佢肚附近既皮膚係爛咗，嘩..搞到我要避開佢啊！

十月二十三日 (Gold Coast, near Main Beach)

今日全日都好Hea，只係浪漫地係沙灘漫步，其間有一架戰機係到巡邏，搞到咩氣氛都冇晒，但係咁近見到戰機都好興奮，我估係因為附近有賽車，所以有咁多戰機吧！

之後繼續係麥當當send email比d Host，今日好跨張，我地大約send咗50封WWOOF Letter，今次係有使以來一次過send最多的一次，去到晚上8點幾終於有好消息，因為將會有可能有人收留我倆了。我地希望有工開，因為有工開我地先可以慳多d錢！

題外話，唔知係唔係因為成日食快餐搞到我下巴既暗蒼不停地生長，而老公都唔係太好，因為佢條頸生咗好多好多痕粒，成條頸都係呀！我已經叮囑佢一返到香港一定要睇醫生！

十月二十四日 (Nimbin, Byron Bay)

由YHA抱住興奮既心情向Nimbin出發，皆因Nimbin既YHA提供類似蒙古包既住宿，行咗大概２個鐘終於到喇。一落車就見到其他住客，嘩！個個都古烈治頭+乞兒腳，（其實澳洲好多人都唔着鞋出街，但咁污穢就真係少見）十足野人咁樣。個Receptionist帶我地睇完個蒙古包之後，我地諗都唔諗就即“忟”。出返Town Centre，嘩嘩嘩！原來d野人集中晒係哩到，個個都揸住支啤酒，唔着鞋黑媽媽咁樣！真係見到都打冷震，仲好驚會俾人搶嘢！我估哩d就係叫澳洲BB，同埋我地應該係去咗一個未開發既地方，所以又急急腳咁走咗。

行多一陣去到Lismore，走入超市買包Ham黎食三文治。發現其他舖頭收晒，望吓隻錶，三點咋喎，原來又快番一個鐘，我地哩幾日活在快慢快慢當中。不過都只係晏晝四點姐，唔洗咁快掛。

繼續上路，到咗Bryon Bay，第一時間走咗去Light House睇日落，去到先知哩到係澳洲最東既地方，咁即係應該睇日出而唔係睇日落啦！豬咗。

睇完之後，揸返市中心，見到好多人好多酒吧，同Nimbin比哩到相對好好多。又係時候搵WIFI check吓email喇，點知搵極都搵唔到麥當當，於是走去YHA問下啦，個Recep笑住咁話”We are lucky, we have no Mcdonald here”，咁即係我地No Luck啦，唯有直接打比個Host，掂咗！搵到老細。係時候慶祝喇，殺入超市搵Target，都未搵到就見到筍嘢，登登... 係減至半價既Family size BBQ Chicken，成隻都係A$5.49，仲平過一條Subway foot long。由於得番最後三隻，即時同旁邊個大嬸死過，HaHa，Win咗，搶到兩隻，年青人係唔同d。聞到隻雞好香，嗱嗱林搵個地方拆佢骨，有個海景View就最好喇！所以去到Main Beach動手，食食吓發現旁邊架車d人開始刷牙！唔係掛... 九點都未到就係停車場刷牙？！咁睇黎佢地都諗住係到瞓車！我地都冇理咁多繼續開我地既大餐。

食完之後，我地又要諗今晚瞓邊，因為我地個海景View停車場有條例唔可以瞓車，唯有搵個更好既地方，去到附近一個細公園，發現又有廁所、又有飲水機，應有盡有，雖然都有牌話唔比瞓車，但環境舒適，一於少理。

十月二十五日 (Nimbin, Byron Bay)

有車聲…..我望吓個鐘先係5點幾，有條好似傞佬咁樣既友仔行緊埋黎，即刻叫醒龍生，佢立時從鼻「寒」聲中彈起，同時個條友已經敲緊我地隻窗並問我地"Why are you sleeping in the car….."，個人都未醒就答佢"We aren’t just sleeping here, we also brush our teeth in the drinking fountain." WAKAKA….講笑姐，我地冇咁答佢但係我地琴晚真係有咁做，其實我地係「冷」醒咁答佢"We are waiting for SUNSET"，佢望吓隻錶咩都冇講就走咗... 我地諗一諗家吓咁早等乜鬼sunSET呀，係等都應該等sunRISE啦，之後就係一陣爆笑聲.....

由於真係太早既關係都唔知去邊好，唯有再去返個海灘到吹吹風+瞓多陣啦！

等到九點幾我地就起行去第4個Farm到喇！我地跟住佢俾我地果個direction，去到佢屋企前佢話會見到一個好大塵既地方，嘩！果真好大塵，大到望住個倒後鏡時咩都睇唔到！

好野，今晚有覺好瞓喇！

十月二十六日至十月三十日 (4th Farm in UKi, Maria's Farm)

 Day 1 – 十月二十六

今次有一個大project要做就係要幫手起一間屋，但係...係比四隻鴨仔住既！一開始我地就做咗一件非法既事...，就係「起釘」，由於Maria買d二手木返黎，但d舊木好多釘係上面，所以...之後Maria講晒d size俾我地聽之後我地就開工，真係好辛苦，因為要挖泥，而阿Joe仲要同d老年樹根死過...佢挖到隻手都起咗水泡，而我就弄傷了雙手...痛、痛、痛死人~~

今日哩到落好大雨，Maria話哩到一個月都未落過雨，點知我地黎到即刻帶黎雨水，所以佢好Welcome我地，哈哈！

Day 2 – 十月二十七日

繼續起屋、繼續挖泥、繼續同2個小朋友玩、繼續工作… 今日我仲同10cm x 5cm粗既木死過，因為我要將佢地鋸成劃一長短，鋸咗一條咋，用咗我大半個鐘，但係果到大概有14條… Maria見到唔對勁，所以佢出去租咗個電鋸返黎，同埋表演俾我地睇，對準位置之後手起刀落一秒鐘就K.O.咗條木，唔係吹水真係一秒！不過代價就要付出A$50，好貴呀！

死火，今日阿Joe話我應該起碼重咗10磅，鬼咩佢係咁叫我食野，佢自己食麵包果時又問我食唔食，我話要節食，佢又話”茶”少d牛油花生醬，點知食完之後佢又問我要唔要，我諗一諗答佢好呀”茶” 花生醬啦唔該，哈哈哈哈，咁唔肥又真係有鬼囉！死喇今次真係死喇，真係要節食先得！

Day 3 – 十月二十八日

繼續起屋，繼續落大雨... 由於我地即將離開喇，好心急想快D幫佢起好間屋，不過應該都冇咩可能！繼琴日我鋸完木之後，今日到龍生喇，佢要鋸「荀」位，哩次冇電鋸喇，佢要擺出最佳姿態黎鋸，我不禁諗起「充勁盡表現，全靠龍蝦麵(力寶健)。」wahahahhahaa…

今次要介紹一吓哩個素食家庭既女主人，Maria，佢係一位好大力既女士，佢有兩個女，大女Alice - 7歲，暴力形，有咩係手都一定會俾佢破壞；細女Bonnie - 4歲，神打形，經常好似有野上身；仲有隻狗Clayo，年齡不詳，袋鼠形，因為佢見得袋鼠多，學埋佢地咁跳，同埋佢無肉食，搞到我地煮親肉佢都會跑過黎我地間屋仔，好搞笑！仲有佢地成家人都好污穢，小朋友會唔著鞋通街走，一腳泥又踩番入屋，成屋都係泥又唔抺地，食物跌落地下都會照食，有曱甴死咗係地下二日都冇人理，我唔著襪都真係唔咁入去佢地間屋！真可怕... 不過佢地全部都好Nice既~~

Day 4 – 十月二十九日

今日開OT呀，我就唔係做咗太多野，係龍生辛苦點，因為太多粗重工作了。今日放工Host煮咗千層麵俾我地食，真係好味！

Day 5 – 十月三十日

最後一日開工了，我地起俾鴨仔間屋所有嘢都ready好，等d圍欄運到鴨仔就會有新屋喇！由於，我地都等唔到果日，所以我地叮囑咗Maria一定要send返張相比我地睇！

聽日係萬聖節，係澳洲應該唔係有太多人大事慶祝，佢地反而依家已經準備好聖誕節既事，今日Maria仲買定聖誕禮物比佢2個女tim！由於聽日係萬聖節，我地今日都買咗2支糖比大細女，佢地好開心呀！

明天又要一早出發，向我地最後一個Farm出發，希望事事順利啦！