跨年遊‧中國

十二月十日
上海之旅

今日要出發到上海，點知5點幾突然間好唔舒服，好想好想嘔... 到老公起身時才發現我在發燒中，好辛苦啊！但冇理由放棄唔去旅行嘛，所以捱過去！

發燒過關好似做了些什麼唔見得光既事，因為好怕被人發現，被人趕出境... 當然我好好彩過完一關又一關，到了最後一關，要係飛機渡過3個鐘，真係好難頂！想嘔又唔好意思，想問人攞藥又怕被人問三問四，好難過才捱得住三個鐘的「長途」機程呢！好在，到了機場家姐來接機，好快就回到家，否則我必在途中撐不過去！

亦都因為有人照顧的關係，我一早吃過藥便早早休息了！多謝家姐的照顧。

十二月十一日

由於昨晚出了一身大汗，整個人一早起床時已覺得好好了，雖然Keep住都有頭痛。不過我估多飲杯水會好好多啊！每次病都好似要同死神拼命，好辛苦，有時候都唔明白點解要有病痛出現，不過我既病痛又點可以同當年耶穌受難既痛來比較呢！

去旅行真係要分秒必爭，即使病住都要出外走一走，今日家姐帶了我們食大茴香越南粉以及行了家樂福商場，可能係我個人還未復原，所以我... 我今日食完野好想嘔返出來，同埋行家樂福商場時引發唔到我既購物慾呢！

之後，老公帶了我去除家匯區，嘩！真係好多人，好五光十色啊！

十二月十二日

今日星期六最啱係一家大細一齊出去飲茶，上海食野真係好平，好好食既野都好平，真係抵。

今晚原本去食「水車牛」，但係我地真係唔太好彩... 我地叫咗海南雞飯... 冇，叉燒飯... 冇，喇沙... 冇！！真係要咩冇咩，我地唯有轉去另一個地方食，Pizza。雖然食物唔稱得上好味，但係平得好過份！全枱食物最貴係個Pizza，講緊都係20蚊人民幣，真係抵！

回程時落雨呀，聽聞未來的一星期會...降至零下幾度，希望，我唔會凍親啦...

十二月十三日

星期日... 成屋人除咗姐夫之外，全部人都瞓到十二點幾，簡直係一起身無咗半日。之後我地去咗時代廣場附近食茶餐廳，經過咗外灘，見到現時上海暫時最高既建築物。

之後小朋友就去咗玩波波池，大人就去咗一間名叫迪卡濃專買戶外用品既公司逛。果到d野唔係件件貨品都平，但係比起香港就真係平少少！雖然話唔係件件都好抵，但總會好容易搵到平價區。我地哩d唔捨得用錢既都買到野，就證明真係抵啦！

今晚食衡山小館，又係一間好食、抵食、超乾淨既餐廳。

食過飯，返到屋企家姐介紹我地睇「Full House‧浪漫滿屋」，其實哩部劇早已係香港播過，不過我一集都未睇過，難得今次可以咁多人一齊睇，我當然唔會放過哩個大好機會啦！仲有睇完我先知原來個男主角就係阿Rain!!

十二月十四日

真係過份，今日我地起身時又係十二點幾！無計啦，鬼叫我地尋晚一次過睇咗五集咩 =.=，睇完既時候已經係凌晨四點幾喇。雖然個劇故事簡單，但真係好好笑。

今日係屋企食完午飯，我同老公去咗「上海集散旅遊中心」。果到係一個平價既旅遊中心，我地見到由上海出發去烏鎮，都只不過係百幾蚊一個人，真係抵ga！佢包咗來回程車票以及入場券。所以我地黎緊幾日會搵個機會去下哩d地方。除此之外，今日我地仲去咗上海IKEA，嘩！真係大到你唔信。

今晚會繼續睇Full House，不過唔會睇太多，因為明天要早起身同老公個表妹去食Lunch。

十二月十五日

今日係Ryan係學校表演，我地會合了表妹Julie後便一同到了Ryan學校。嘩！我今天才明白到為什麼國際學校的收費會是如此貴！大概離不開校園的活動範圍以及師資吧！今天進入這間學校禮堂時，我誤以為自己走進了香港大會堂呢！

十二月十六日

今日全日大部份時間都係處於Hea既狀態，只有做了一件較有用的事，就是為明天的旅遊買門票呢！

十二月十七日
周莊一日遊

尋日係「上海集散旅遊中心」買了車票，今朝一早起身趕車到集散區會合表妹一齊到，中國第一水鄉，周莊一日遊。很多人說周莊沒有以前般漂亮，因為這個水鄉都變得相當商業化，雖然我也感受到，但... 對我這個過客來說，這個地方真的很美，只是人太多吧！

十二月十九日
蘇州一日遊

『蘇州一日遊』- 今日同家姐一家以及表妹一同到蘇州遊覽，見識到山水花木景的園林「留園」，以及吳中第一名勝「虎丘」，第一次近距離睇斜塔，確是有不同感受。

十二月二十日

今日食東北人，諗都諗唔到原來東北人既菜係充滿咁多色彩！而今日其中一道菜係食羊腿，嘩果條腿真係好長呀！好可惜我唔食羊呢！

十二月二十一日

今日一次過到訪了步行街、城隍廟、田子坊以及新天地，真係累透，因為我地又係本住唔用錢既大原則，幾乎全部目的地我地都係步行而至... 哈哈~返到屋企家姐問我地後日出發去廈門有冇問題，我地哩D閒人當然冇問題啦！

當姐夫報名訂機票時因為發音唔準... 我個名被改為「錢桂靈」，真係差點上唔到機呀！

十二月二十三至二十八日
廈門之旅

二十三日那天一早出發坐飛機，好衰唔衰大陸機keep住係機內sell野，搞到D人全部都瞓唔到搞，大陸人真係好識做生意呢！ 落機對廈門第一個印象就係...好鬼熱~~

一連幾日既廈門之旅完結了，去過鼓浪屿、去過土樓、去過中山路環島遊，又再一次係短短幾日睇咗好多好新鮮既事。

最印象深刻應該係土樓這個地方，土樓樓高3至5層，佔地約200平方米者居多，通常一座土樓內居住多達數百人口，有的土樓內擁有的房間多達328間，為一龐大的家族所共同居住。這種群居方式，使土樓建築成為一座具有防禦功能的小城。土樓外觀呈多種不同的造型，有方形、圓形、多角形等不同形狀，還有內環、外環等多種建築形式，內設有廳堂、糧倉、水井和臥室等。土樓的建築形式，使其具有安全防衛、冬暖夏涼和防風抗震的功能。

廈門我地住既溫泉酒店，相當高質素！

中山路環島遊，踩住單車咁遊！

鼓浪屿，可能係聖誕節既關係，呢個地方相當熱鬧！

十二月二十九日

阿蘭终於黎到上海了，因為佢... 我付出了第一次搭磁浮既好時光，磁浮真係好快，不過去唔到300km就好似有被騙的感覺呢！佢第一日黎到，我都冇比時間佢休息，馬不停蹄就帶佢出去四周觀光了。

最開心就係我地一齊好有藝術氣質咁去咗上海藝術館~

十二月三十日
杭州之旅

今朝晨咁早向杭州出發，雖然好凍，但係為咗去欣賞印象西湖一面，幾辛苦都要去睇睇既。

一出火車站... 已經有數十名人士黎叫你租車!!我地緊係唔租啦，唔理佢地，佢地都會一直跟住你，跟到你去巴士站!去到巴士站等緊車既時候，會突然有d好心人士想教你去西湖，但其實個d人都係假好心，最終目的都係想「坤」你錢!唔好以為你上車問個巴士司機點去，佢就會答你，你錯啦!!佢地會扮聽唔到，唔會理你!!當你上左車，以為無事既時候，又會唔知係邊度走出一個好心人士，想教你點去，佢會同你講只係想幫你，但其實佢都係個d想「坤」你錢o既人!!!



當你平安去到西湖，又唔好以為真的百分百安全，你估都估唔到，原來真係無好心人!!我地行左西湖行左大約四分一既時候(諗緊行邊邊既時候)，有位好心女士，自稱係某個園既管理員，介紹我地點玩係最好，原本我地係想去[雷峰塔]，但係個位女士就話去雷峰塔就要等日落既時候去，個個時候睇係最靚，但係我地問個陣只不過係中午，所以佢就介紹我地去一個叫[九溪]既地方睇瀑布，睇完瀑布就可以行去d農民地方飲杭州出名既龍井茶，佢又會同你講...農民個d龍井係最正宗既，出面街買既都係假既，同埋會好貴，佢又會同你講唔買都得架，咪去飲下龍井茶囉...咁我就問佢我地點搭車去，佢會非常之好心咁教你... 首先坐x號巴士去到終站，然後就要坐d叫"麵包車"既小型貨車上去睇瀑布(因為行要行好遠)，然後就要自行一段路去一條村(去飲龍井)，之後個度就會有巴士可以去返西湖，咁就剛好去雷峰塔睇日落啦!!

咁我地就相信佢去坐巴士，係巴士上... 又會突然有位好心人士同我地傾計，介紹杭州名勝，原來佢係個d開「麵包車」既人!去到終站，我地就坐左「麵包車」上去睇瀑布，坐左唔夠幾分鐘就到喇!!條瀑布只不過係d小瀑布，不過個湖就好清好靚既!!睇完瀑布，我地就沿路去農民既地方(因為其實只不過你得一條路)，行下行下，我地見到間寺廟就停底影下相，突然間又會唔知邊度走出個亞嬸同我地講，問我地係咪要飲茶，係就要繼續向前行，佢話呢度無得茶飲架!!!(真係好奇怪)咁我地就一直向前行，行下行下，見到三個人(兩女一男既香港人)，不停向我地示意叫我地返轉頭唔好各前行，咁我地就行埋去問咩事啦，原來前面係真係有條村，不過就無路向前行架啦，都無咩巴士出返去，所以我地就跟個幾個香港有緣人返轉頭，即刻就有人係後面大叫...同我地講行個邊先岩!!

原來佢地最終既目的就係要我地去個條村，俾佢地屈我地買龍井茶，亦都唔係有咩巴士可以去返西湖，最後就係要自己步行返出去...去返原本我地落車既巴士終站，白白浪費了好幾個小時!!!

我地同返個幾個有緣人傾返，相信大家都係係同一個地點，俾同一班人用同一手法被「坤」!!最恐怖既就係... 我相信佢地係同一集團or係同一條村既人，佢地會分佈係不同既地方，其實佢地會有唔同既人係唔同既地方監視住我地!!諗起都恐怖!好彩撞到個幾位真係好心既香港人!!如果唔係都唔知發生咩事!!!

搞完一大輪都要食野，今晚食吓街頭美食！

十二月三十一日

倒數... 回顧每年世界大事總會找到不愉快的新聞，唯盼望新的一年世界各地有新的開始，祝願世界和平。

很高興的今年倒數有阿蘭、有老公、有屋企人，仲有Arron Kwok一齊渡過。老公仲同姐夫一齊放「孔明燈」祝願大家身體健康 :)