游泳篇

上回提到受傷一事，經親戚及醫生建議下，終於三月尾Join咗一個月游水計劃，親戚話泳池很好因為有Suana，又有Whirlpool，心諗...對我黎講都真係一件好事，於是第一日老公同我食飽飯大約八點幾就去游水。入會手續好快，Form都唔駛填一張，只係講低個名、住址、電話同埋影一張入會相就搞掂！滿心歡喜走入更衣室，點知...原來Locker要比C$0.25一個，因為我冇錢係身，唯有係泳池入口等老公睇吓點搞作，鬼知...入到去成個泳池都迫爆晒，等咗一陣都見唔到老公，唯由返回更衣室門外睇睇見唔見佢，果然佢真係係果到等緊我！諗一諗，只好共用男更衣室的一個Locker，之後再到泳池入口集合。泳池既分佈..入口處有一個Steam Room、一個Suana Room、一個Whirlpool、另加一個小朋友嬉水池以及一個大泳池。入到去第一個感覺似去咗公眾大浴場，咩國藉既人都會有，坦白講我都幾怕見到咁多人！硬住頭皮浸勁多人用緊既Whirlpool，水溫係好好，只係太多人同一時間一齊用真係唔係幾好，有少少潔癖既老公浸唔夠10分鐘忍唔住走咗去游水！十點鐘就散人喇~


之後每一朝早都係我自己一個去游，由於避過D煩忙時間，所以已經唔再似去咗大浴場了！每一日係浸Whirlpool又好、游水又好、焗Steam又好，什至等沖涼等都會見到好多熟口熟面既人，什至每日都會見到使用泳池人既醜態，要咩有咩!!有時自己都唔係好頂得住，因為佢地做D野真係好嘔心！舉2個小例子啦...有一次我試過邊浸Whirlpool邊見到人用手清潔牙齒，然後扮咩都唔知咁放係水內！我心諗帶支牙刷出嚟啦...笨！又有一次走入去Steam Room舒服舒服一吓時...點知有位女士係裡面係咁做晨操！佢好大聲係裡面操流利國語...."一二三四五，呼！二二三四，嘩！"Keep住係到bee lei ba la，搞到我唔駛2分鐘走咗！

除此之外，上個星期五...我仲上咗一堂保貴的一課！當日我十點幾去到游水，游咗唔夠20分鐘突然間警鐘响起，我一心諗住係誤嗚，因為整個池都冇人理，點知唔夠一分鐘有救生員不停叫MIC話有Virus入侵叫我地快D走，快D走既意思係...唔可以攞野走只可以著住D泳裝，最多你手快可以著返對拖鞋！我就係果個可以著對拖鞋走既人，不過好境不常，外面好大風，我估果朝大約有8-9度啦!!凍到癲咗...企係到食風食咗5分鐘...佢竟然叫我地就咁走過去對面既老人中心！我個心真係講晒粗口，但都要過去因為真係凍同埋要等佢地安排攞返D野ma... "等"真係一件好辛苦既事因為我地係老人中心等咗近2個鐘，哩2個鐘我都係剩著泳衣，真係凍Q死！可以入去攞番野既時候已經近一點了!!邊有咁黑仔ga，Virus都可以比我遇到，仲要學人逃生，你話...係唔係保貴的一課呢！

近幾日游完水後D皮膚都好痕，聽講係因為D水落得太多漂白劑所致....點都好啦，希望自己早日好返~

泳池入口

              

每日不同既手帶