走進Nazca，向「謎」進發！

May 31, 2010 (Day 3)

早一晚我地請咗Hostel幫我地叫的士送我地去Cruz Del Sur巴士站，點知六點四十分都未夠司機就到咗等我地！其實我地住既地方去巴士站唔算太遠，本想慳埋d錢，但為了治安問題以及行理過多而導致各種問題…所以錢都係唔慳得既！

去到巴士站感覺到佢地既規模，Cruz Del Sur果然係秘魯巴士界名不虛傳既名牌子!!!

沿途見到秘魯的安第斯山脈，毫無疑問這片是我見過最美的山脈。下午2點幾終於到步了，嘩！一落車只係見到"(何來)塵埃飛舞"[hehee]，長時間住係Nazca好易變成肺癆！有相為正架，佢地D路好爛，D小販同時間係爛路上賣食物，若你在此...你敢食嘛?

去到巴士站先打電話叫Hostel既人黎接我地，佢地都好快手5分鐘左右已經同我地會合，今次住既Walkon Inn Hostel個樣都唔差，但係…唔叫理想！

去到Nazca當然主打係睇Nazca Lines啦，仲要帶住「迷」既心態到達以及等待觀賞，本身係Hostel有得報名參加Nazca Lines團，而且價錢都叫合理，但因為想睇吓自己係出面報團會唔會平d既原固，所以我地尊登揀咗同我地住果間Hostel聯營既Nazca Lines團格價，本身佢個價錢同Hostel一樣，店主(PePe)仲話個價好合理，又比咗本世界各地遊客寫比佢地既評語記念冊比我地睇，誰知我地發現2009年4月有香港人去過呢個團只需US$56，仲提醒香港人要講價，於是龍生咬實店主唔放，不停同佢討價還價，最終由本來既US$60降價至US$55，佢仲叫我地千萬唔好同人講佢比咗個咁好既價格我地！其實講到口水都乾埋先每人平得US$5！不過都叫好過無！我地仲用咗S/. 30參加埋Chauchilla Cemetery (露天木乃伊)，Gold Process (製金過程) 及Pottery (製陶瓷)等，實行黎個一日遊~