今早一起身第一件事係叫Hostel職員幫我地Book的士去巴士站，點知職員話，Sorry恐怕今日叫唔到的士！原來... 咁唔好彩今日Cuzco發動罷工，搞到交通全面攤渙，激死人呀！
Hostel職員都已經好好即時幫我地打去巴士公司問會唔會改時間，巴士公司叫職員2點再打去Confirm，同時間我地再問佢有冇其他方法可以幫到我地，但佢竟然話無其他辦法可以幫到我地，建議我地自己行去巴士站。平日既我倆一定會咁做，但因為今次行李實在太多喇，根本無辦法咁做！
於是我地決定去SAS Travel果到問一問睇吓佢地有冇車可以車我地去巴士站，點知...講完一大輪之後...個職員去咗隔離既酒店借咗架手推車出來，佢話租呢架手推車要US$10，心諗咁貴...所以我地即時「使出橫手搵個藉口」推咗佢。
食完個Lunch，2點前返到Hostel睇吓有咩消息...因為我地怕巴士公司會係冇通知既情況之下開出，所以我地不停咁叫Hostel職員幫我地打電話去巴士公司問，嘩，巴士公司既時間一改再改，12點打去問又叫你2點再打過，2點打到去又叫你4點再打，終於係4點打到去時知道巴士6點會開出，於是即刻Book的士。真係癡癡地等了4個鐘先離開Cuzco!!
由於要坐差唔多20小時車，所以我地今次買咗頭等區，做吓上等人，果然比平民區靜得多，坐位舒服得多！仲送你偉大祖國既耳筒添。不過唔知係唔係有D人知道今日有罷工，所以巴士都好少人搭。而巴士都相當準時於下午6:15開出，不過已經入黑了，咩景都無得睇！
No comments:
Post a Comment