早上4點幾起來感覺很冷，梳洗完畢，吃過早餐後又開始是日行程。今天所行的路約12Km，大概行10個小時，頭5個小時是上山，尾5個小時是下山。所以今天既一切都是從作戰開始。
其實一路上山對我來說的確很辛苦，一來是感到喘不過氣，二來是對自己沒信心吧！沿路既風光很優美，很獨特，但我只管向前衝，因為我怕我既慢阻礙到其他團友嘛。老公見我上山時行得如此辛苦，佢都忍唔住幫我攞埋個背包，當上了我的私人Porter，以作支持和鼓勵，係這樣子既情況之下我又怎可輕易放棄呢！我不停咁同自己講我要征服Dead Woman's Pass！！同時間我同老公都分開了上山，因為我既行走速度同隻龜應該係無分別，哈哈！
沿途都聽到好多人問Porter仲有幾耐先到，通常d porter都會話...「快架喇係前面轉個彎就到」，但其實呢d都係一d善意的謊言。我遇到一位屬於我間旅遊公司既porter，可能佢見我個樣就死，所以佢好好心問我用唔用佢支pole，佢話會行得舒服d，但我見佢揹住咁多野又點好意思用佢呢！雖然我唔記得佢叫咩名，但我心存感激！
好辛苦，好辛苦地一級一級爬上去，終於係11點幾我聽到老公係山上叫「老婆仲差少少咋，加油呀！」抬頭一看我真的只差幾步便登上這4,200米的高山 (Dead Woman's Pass)了...「登登登」我得咗喇！此時我所感到既快樂係複雜的，係不能夠形容的！更開心既係我終於見返我既老公，團友不停咁同我講，我有一個好老公以及好Impress!!老公我愛你呀！
回頭看著我所走過的路；看著我身邊這位氣都無喘既老公；看著眼前一個又一個山脈，我實在不敢相信我所站在的地方竟是4,200米高山之上。這裡的風景太自然了，自然得叫我驚訝！心想我是在做夢嘛？但高處風很大，大得把我吹醒，其實眼前的東西全都是真的。這4,200米是我倆一同到過最高的地方，是我倆一同經歷、見證過的一個美好回憶之一。
於最高處逗留了一會便要下山了，其實老是不明白為何作天花了8小時於2,380米開始，今天又再花5小時到達4,200米高山，但為何、為何，在我未欣賞足夠的情況之下又要趕著下山呢...?
下山之時又是作戰時候開始了，古語有云「上山容易，落山難！」但對我呢d「80後」來說「上山難，落山更難！」因為一路下山梯級太高了，我既膝頭唔多聽話，痛了起來，但...一點也難不到作戰中的我。今次上上落落總比年初登泰山時舒服得多了。
今天下山時所看到的風光隔外優美，或許是今天作戰過後賺來的禮物呢！
差不多入黑才到達營地，於是把握時間走到洗手間去，因為營地既洗手間係無燈提供。嘩！入到去洗手間真係...『聞所未聞』，見到都『嚇鬼死人』！唯有扮時運高咩都睇唔到啦！返到自己個帳幕時，又係時候開始清理一吓自己，見今日對腳攰攰地，我地一於...浸吓佢！點知浸浸吓老公突然話...其實呢個係洗面盤黎，希望聽朝唔會用返呢個盤啦...嘩！咁即係聽朝洗唔洗面好呢？
今晚將會係最凍既一晚，聽說大約只得「-5度」，由於我倆自備的睡袋大約只可抵擋「0度」，所以我地將所有大褸穿上身，希望有覺好瞓啦！
No comments:
Post a Comment