不愉快地離開‧Lima

June 21, 2010 (Day 24)

今晚係機場等候時未能入睡，但見到眼前呢2位人兄...我都好想攞個睡袋出黎學一學佢地 :) 外國人真係咩都做得出！

等到凌晨2點幾終於可以Check-in，估唔到我地搭既呢間航空公司除咗空中服務員態度唔係咁得之外，原來佢地既地勤同樣唔掂！皆因當我地去到櫃檯Check-in時，老公竟然被航空公司職員拒絕入境！理由係... 佢地未見過拎住新舊護照一齊入境既情況！搞到精神極差既我忍唔住話咗個職員幾句之後我就再無心機聽佢講廢話！我好不負責任咁留下老公一人作戰，我相當佩服老公可以沉住道氣但又發住脾氣咁同d職員溝通，亦都因為佢死纏爛打既情況之下，終於可以入境了，不過望吓個鐘我地應該爭論咗差不多2小時！頂！

拒絕老公入境既呢位男職員，於唔熟讀法例下一道叫老公尋求政治庇護，佢話一係去中國駐秘魯大使館，一係去美國駐秘魯大使館，但此行可能要係Lima多留一星期！(嘩！駛唔駛玩到咁大呀！) 你話我個心有幾多粗俗說話想講出來呢！

因為可以入境我既心情較為平伏下來，行過Duty Free見到我最愛既M&M~ 成個人即時開心返晒！

今日搭5:40am機，如無意外8點幾我地會到達Bogota。

到達Bogota約是早上8點幾，我地就係要係呢個機場等10個鐘，即係晚上6點幾先可以再轉機去Miami！死未！不過托老公鴻福...我可以入去呢類型貴賓室等待下一班機，睇吓日劇以及瞓住覺等時間真係會過得快d~！

終於等到5點幾可以去Boarding喇，點知...老公本Passport又出意外喇！得返半個鐘，想點呀！大約係6pm既時候機組人員跟我妙問，我當然會妙答啦！佢話如果你老公係6:15pm都未能上機，咁你會唔會上呢？我話我當然唔會上，因為我本passport係佢到嘛！佢竟然比唔到反應我！跟住我問佢，咁佢唔返黎你地係唔係要開機呢？佢話冇錯我地一定要準時開機，咁我就答平時我準時上機你地都唔會準時開機啦！哈，佢今次竟然"O"住咀咁行開咗！好彩係6:13pm老公跑回，唉，真係步步為營！

老公能夠大步檻過既主要原因，係佢夠冷靜即時上網搵返條例同佢傾！老公我再一次佩服你！

終於係10點幾空降Miami機場了！今晚又要係機場痴痴地等~